दापोरी बु.येथे कर्जबाजारी शेतकऱ्याची आत्महत्या!

अमळनेर (प्रतिनिधी) दापोरी बु . येथील एका मध्यम वर्षीय कर्जबाजारी शेतकऱ्याने 17 जून रोजी सकाळी पहाटे तीन वाजता घराच्या छताला गळफास घेऊन आत्महत्या केली . आत्महत्या केलेल्या शेतकऱ्याचे नाव पंढरीनाथ काशिनाथ पाटील (वय-53) असे आहे.
मयत पंढरीनाथ पाटील यांच्याकडे 8 बिघे शेतजमीन आहे . त्यांचेकडे विकास सोसायटीचे सव्वा दोन लाख पीक कर्ज असून थकलेले आहे . तसेच त्यांनी बाहेरील पण पैशांची हात उचल केली असल्याचे समजते . गेल्या तीन चार वर्षांपासून बोंडअळी , बेमोसमी पाऊस , दरवर्षी येणाऱ्या उत्पादनात घट आणि नापिकीमुळे ते बिकट आर्थिक संकटात होते. शेतीला लागणारा खर्च ,घर खर्च आदी सांसारिक आर्थिक प्रपंच कसा भागवावा . या कारणाने ते नैराश्याचे जीवन जगत होते . या कारणामुळे त्यांनी कंटाळून आत्महत्या केली , असे त्यांच्या नातेवाईकांनी सांगितले . त्यांचे पश्चात पत्नी , दोन मुले , दोन मुली , एक भाऊ , जावई , नातवंड असा परिवार आहे . ते माजी ग्रा.प.सदस्य साहेबराव काशिनाथ पाटील यांचे लहान भाऊ होत.