कर्तव्याला सलाम! रेल्वे खाली येणार्‍या चिमुकलाचे पॉईंटमनने वाचविले प्राण!

वांगणी (प्रतिनिधी) येथील रेल्वे स्टेशनवर एक चिमुकला आपल्या अंध आई सोबत जात असतांना रेल्वे पटरीवर पडला, समोरुन जोरदार वेगाने रेल्वे येत असतांना कर्तव्यदक्ष पॉईंटमन देवदूत म्हणून धावून आला आणि त्या चिमुकलाचे प्राण वाचविलेे.
सविस्तर वृत्त असे की, वांगणी रेल्वे स्टेशनवर शनिवारी संध्याकाळी पाच वाजून तीन मिनिटांनी एक मुलगा आपल्या अंध आईसोबत प्लॅटफॉर्मवर चालत होता. पण चालत असताना त्या लहानग्याचा तोल गेला आणि तो मुलगा ट्रॅकवर पडला. लहान मुलगा जेव्हा रेल्वेच्या ट्रकवर पडला नेमक्या त्याच वेळेला उदयन एक्सप्रेस त्या मुलाच्या दिशेने येत होती. त्या मुलाची अंध आई आपला मुलगा नेमका कुठे पडला हे चाचपडत होती. बिचारी कावरी बावरी झाली होती. तिला कळेना की नेमका तो कुठे पडला असावा. त्याचवेळी स्टेशनच्या दिशेने उदयन एक्सप्रेसचा धडधड आवाज वेगाने वाढत होता.
तो लहानगा अजून सावरला पण नव्हता आणि ट्रेनही जवळ येत होती. तो मुलगा प्लॅटफॉर्मवर चढायचा प्रयत्न करत होता, पण प्लॅटफॉर्मची उंची जास्त असल्याने तो वर चढू शकत नव्हता. तितक्यात एक व्यक्ती
आपल्या जिवाची पर्वा न करता त्या मुलापर्यंत पोहोचली. पटकन त्याने मुलाला उचललं आणि प्लॅटफॉर्मवर फेकून दिलं आणि तो स्वतः विजेच्या गतीने प्लॅटफॉर्मवर चढला. तो व्यक्ती म्हणजे रेल्वेचा पॉइंटमन मयूर शेळके. मयूर कर्तव्यावर होता. त्याही परिस्थितीत त्याने आपल्या हातातील हिरवा झेंडा सोडला नाही.

मयूर हा पॉईंटमन आहे. पॉईंटमन म्हणजे ट्रेनला पुढे जाण्यासाठी ट्रॅक सुरक्षित आहे म्हणून हिरवा झेंडा दाखवण्याचं काम असो की जिथे ट्रॅक एकमेकांत गुंतलेले असतात तिथे सगळं आलबेल आहे हे पाहण्याचं काम करतात. मयूर नसता तर त्या मातेने आपल्या मुलाला कायमचं गमावलं असतं. मोठा अपघात आणि दुर्दैवी घटना होण्यापासून मयूर शेळकेने वाचवलं. त्याच्या धैर्याला सलाम !

मयूर हा खराखुरा हिरो आहे, मयूर नसता तर त्या मुलाला वाचविणे कठीण झालं असतं. कदाचित मयूरचा स्वतःचाही या झटापटीत जीव गेला असता किंवा त्याला अपंगत्व आलं असतं,पण या सगळ्याची पर्वा न करता त्याने त्याला वाचवलं.मयूरचे काम इतरांसाठीही आदर्श घेण्यासारखे आहे.